काठमाडौँ – सन् २०२६ मा हुने महिला टी-२० विश्वकपका लागि ग्लोबल छनोट प्रतियोगिता नेपालमा आयोजना गरिने भएको छ। अन्तर्राष्ट्रिय क्रिकेट परिषद (आईसीसी)ले जनवरी १२ देखि फेब्रुअरी २ सम्म नेपालमा हुने प्रतियोगिताको औपचारिक घोषणा गरेको छ।

प्रतियोगितामा १० टोली भाग लिनेछन् जसबाट शीर्ष चार टोलीले इंग्ल्याण्ड र वेल्समा आयोजना हुने विश्वकपका लागि छनोट हुनेछन्। बंगलादेश र आयरल्याण्ड स्वतः छनोट भएका छन् भने थाइल्याण्ड र नेपाल एशियाबाट छनोट भएका छन्। अमेरिका, अफ्रिका, युरोप र इस्ट एसिया-प्यासिफिक क्षेत्रबाट बाँकी टोलीहरू छनोट हुनेछन्।

नेपाल क्रिकेट संघ (क्यान)ले प्रतियोगिता सफल बनाउन तयारी सुरु गरिसकेको छ। यो नेपालले आयोजना गर्ने महिला क्रिकेटकै सबैभन्दा ठूलो प्रतियोगिता हुनेछ।