काठमाडौँ – बलिउड अभिनेता शाहरुख खानलाई ७१औं राष्ट्रिय चलचित्र पुरस्कारमा ‘जवान’ फिल्मका लागि उत्कृष्ट अभिनेता घोषित गरिएको छ। विशेष कुरा के भने, उक्त पुरस्कारको घोषणा निर्देशक आशुतोष गोवारिकरले गरेका थिए, जसले सन् २००४ मा शाहरुख अभिनीत चर्चित फिल्म स्वदेश निर्देशन गरेका थिए।

शाहरुखसँग गोवारिकरको यो सम्बन्धका कारण सामाजिक सञ्जालमा विभिन्न टिप्पणी र व्याख्या सुरु भएका छन्। धेरैले यसलाई “२० वर्षअघि नपाएको न्याय अब पूरा भएको” भन्दै प्रतिक्रियाहरू दिइरहेका छन्।

स्वदेशमा शाहरुखले निभाएको मोहन भार्गवको भूमिकालाई दर्शक र समीक्षकले अत्यन्तै प्रशंसा गरेका थिए। सो वर्ष शाहरुखले राष्ट्रिय पुरस्कार जित्ने अपेक्षा गरिएको थियो। तर त्यो वर्ष सैफ अली खानले ‘हम तुम’ फिल्मका लागि पुरस्कार प्राप्त गरे।

२० वर्षपछि त्यही निर्देशक आशुतोष गोवारिकरले शाहरुख खानको नाम घोषणा गर्दा फ्यानहरू भावुक देखिए। सामाजिक सञ्जालमा धेरैले यसलाई “पुरानो न्यायको पुनःस्थापना” को रूपमा व्याख्या गरेका छन्।

एक प्रयोगकर्ताले लेखे, “२० वर्षअघि ‘स्वदेश’ को लागि नपाएको पुरस्कार आज आएर आशुतोषकै मुखबाट घोषणासँगै पाएका छन् — यही हो जीवनको घुम्ती।” अर्का प्रयोगकर्ताले भने, “जीवनले कहिलेकाहीँ यति फिल्मी मोड लिन्छ कि विश्वास गर्न गाह्रो पर्छ।”

शाहरुख खानले विगतमा माई नेम इज खान, पहेली, चक दे! इंडिया लगायतका फिल्महरूमा गहिरो अभिनय प्रस्तुत गरेका थिए। तर राष्ट्रिय पुरस्कारबाट कहिल्यै सम्मानित भएका थिएनन्। यो शृंखला अब जवान मार्फत अन्त्य भएको छ।