काठमाडौँ – बलिउड अभिनेत्री कंगना रनौतले ‘क्वीन’, ‘तनु वेड्स मनु’ र ‘तनु वेड्स मनु रिटर्न्स’ जस्ता सफल फिल्महरूबाट दर्शकको मन जितेकी छिन्।

यी फिल्महरूले उनलाई बलिउडमा ठूलो सफलता दिलाएका छन् भने ‘तनु वेड्स मनु रिटर्न्स’ महिला निर्देशित फिल्महरूमध्ये सबैभन्दा बढी कमाई गर्ने फिल्म बनेको छ। अहिले कंगना ‘क्वीन २’ र ‘तनु वेड्स मनु ३’मा पुनः विकास बहल र आनन्द एल रायसँग सहकार्य गर्दैछिन्।

सूत्रका अनुसार, कंगनाले नोभेम्बर २०२५ बाट ‘क्वीन २’ को छायांकन सुरु गर्ने तयारी गरिरहेकी छिन्। विकास बहलले ‘क्वीन २’ को पटकथा तयार गरिसकेका छन्, भने हाल बेलायतमा फिल्मको लोकेसन खोजी भइरहेको छ। पहिलो भाग जस्तै, ‘क्वीन २’ पनि भारत र विदेशमा छायांकन हुने बताइएको छ। लन्डन सम्भावित लोकेसनमध्ये एक हो।

निर्माण टिमले पटकथा तयार भएसँगै फिल्मको काम अघि बढाउन उत्साह व्यक्त गरेको छ। ‘क्वीन २’ पछि कंगना ‘तनु वेड्स मनु’ फ्रेन्चाइजमा फिर्ता आउने तयारीमा छिन्। आनन्द एल रायले ‘तनु वेड्स मनु ३’ को पटकथा लेखिसकेका छन् र आगामी वर्षको सुरुवातसम्म फिल्मको छायांकन सुरु गर्ने योजना छ।

यस फिल्ममा कंगना रनौत र आर माधवनले मुख्य भूमिका निभाउनेछन्। फिल्मले अघिल्ला भागहरूजस्तै हास्य र भावुकताको समिश्रण प्रस्तुत गर्नेछ।

‘क्वीन २’ र ‘तनु वेड्स मनु ३’ दुबै फिल्मलाई बक्स अफिसमा राम्रो व्यापार गर्ने अपेक्षा गरिएको छ। अघिल्ला भागलाई दर्शकले मन पराएपछि, यी सिक्वेलहरूले पनि राम्रो प्रतिक्रिया पाउने विश्वास गरिएको छ।