काठमाडौँ– नेपाली नृत्य क्षेत्रका पिताका रुपमा लिइने नृत्य गुरु भैरव बहादुर थापा ९२ औं वर्षमा लागेका छन् ।

थापालाई जन्मदिनको शुभकामना व्यक्त गर्न संस्कृति पर्यटन तथा नागरिक उड्डयनमन्त्री सुदन किराती आइतबार बिहान कालोपुलस्थित थापाको निवास पुगेका थिए ।

मन्त्री किरातीले थापा जिउँदो सम्पदा भएको बताउँदै टोपी र दोसल्ला ओढाएर शुभकामना दिए ।
थापाको जन्म वि.सं.१९८८ साल फागुन ६ गते बाबु पदमबहादुर र आमा ताम्बुला योञ्जन थापाको कान्छो छोराका रुपमा काठमाडौंको कमलपोखरीमा भएको हो ।

१० को दशकबाट नै नृत्य निर्देशकका रुपमा उनले नृत्यकलालाई अगाडि बढाएका हुन् । ‘सांस्कृतिक संस्थान’, ‘भैरव नृत्य दल’ जस्ता संस्थामा आवद्ध रहेर उनले नेपाली नृत्य क्षेत्रलाई अमूल्य योगदान दिएका छन् ।

उनले ६५ वर्ष समय लगाएर नृत्य लिपि र प्राविधिक पाटो सम्बन्धि ‘नृत्याक्षर विज्ञान’ पुस्तक तयार पारेर सार्वजनिक समेत गरिसकेका छन् ।