काठमाडौँ– नेपालमा सबैभन्दा धेरै हल भएको क्यूएफक्स सिनेमाजले नेपाली सिनेमालाई कम शो दिएको भन्दै फिल्मकर्मीले विरोध जनाएका छन् । फिल्मकर्मीले नेपाली फिल्महरुलाई कम शो दिएर विदेशी फिल्मलाई बढी शो दिएको भन्दै आक्रोश व्यक्त गरेका हुन् ।
यसअघि पनि पटक पटक क्यूएफएक्सले कम शो दिएको भन्दै सामाजिक सञ्जालमा विरोध हुँदै आएको थियो । फिल्मकर्मीले भने आफ्नो फिल्मले कम शो पाउँदा मात्र आवाज उठाउने गरेका छन् ।
भोलि शुक्रवारदेखि नेपाली फिल्म रंगेली, उपहार र काँडेतार प्रदर्शनमा आउँदै छन् । यी फिल्मलाई क्यूएफक्सले निकै कम शो दिएको छ भने आफूले भित्र्याएका हिन्दी तथा अङ्ग्रेजी भाषाका फिल्मलाई धेरै शो दिएको छ ।
क्यूएफएक्सले नेपाली फिल्म ‘उपहार’ र ‘रंगेली’ लाई ६/६ शो दिएको छ भने ‘काँडेतार’ लाई जम्मा ४ शो दिएको छ ।
नेपाली फिल्मको तुलनामा क्यूएफएक्सले एप्पल इन्टरनेनमेन्टका तर्फबाट नेपाल भित्र्याएको हिन्दी फिल्म ‘शैतान’ र अङ्ग्रेजी भाषाको फिल्म ‘कुङ फु पाण्डा’ लाई भने धेरै शो दिएको छ ।
क्यूएफएक्सले अनलाइन साइटमा खुलाएको बुकिङका अनुसार यो समाचार तयार पार्दासम्म शुक्रवारका लागि हिन्दी फिल्म ‘शैतान’ लाई २० शो दिएको छ भने ‘कुङ फु पाण्डा ४’ लाई १९ शो दिएको छ । यसरी हेर्दा तीन वटा नेपाली फिल्मलाई भन्दा एउटै विदेशी फिल्मलाई धेरै शो दिएको छ ।
फिल्मकर्मीले सामाजिक सञ्जालमार्फत क्यूएफएक्सले नेपाली फिल्मकर्मीले हेपेको भन्दै विरोध जनाएका छन् । फिल्मकर्मीले आफैले नेपाल भित्र्याएका विदेशी फिल्मलाई काखा र नेपाली फिल्मलाई पाखा लगाएको आरोप लगाएका छन् ।
क्यूएफएक्स सिनेमाज नेपालमा सबैभन्दा बढी पर्दा भएको हल भएकाले पनि यसले कम शो दिँदा फिल्मको व्यापारलाई नै प्रत्यक्ष घाटा हुने फिल्मकर्मीले गुनासो गर्दै आएका छन् ।
यो खबर पढेर तपाईलाई कस्तो महसुस भयो ?
प्रतिक्रिया