काठमाडौँ – कडा सङ्घर्षबाट बलिउडमा स्थापित एक नाम हो – नवाजुद्दीन सिद्दीकी । सानो भूमिका लागि समेत निकै चक्कर लगाएका उनी अहिले बलिउडका उत्कृष्ट अभिनेताहरूमा गनिन्छन् । 

बलिउड सिनेमाका  ‘हिट मेसिन’का रूपमा चिनिनने उनले जीवनमा धेरै हण्डर खाएका छन् । उनको जिन्दगीमा एक पटक यस्तो समय समेत आयो उनले आफू बस्ने फ्ल्याटको भाडा समेत तिर्न सकेनन् ।

यही कारण बिहान बेलुका खाना पकाउने सर्तमा ओत पाएका उनले सन् २००२ देखि २००५ सम्मको समय निकै मुस्किलले कटाए । 

यही सिलसिलामा एक पटक उनलाई खाना खाने ठाउँबाट कठालो समातेर निकालिएको थियो । एक अन्तर्वाताका क्रममा यो घटना स्वयम नवाजुद्दीनले खुलासा गरेका हुन् ।

उनका अनुसार त्यति वेला यस्ता धेरै प्रोडक्सन हाउसहरु थिए जसमा कलाकारले खाना खाने आफ्नै नियम थिए । जुन नियमअनुसार ठूला र चलेका कलाकार र साना तथा सङ्घर्षरतहरूले खाना खाने ठाउँ फरक हुन्थ्यो । जहाँ कयौँ पटक उनी ठूला कलाकारले खाना खाने ठाउँमा पुग्थे ।

यसै क्रममा एक पटक उनलाई ठूला कलाकार भएको ठाउँमा आएको भन्दै कठालोमा समातेर बाहिर निकालियो ।

नवाजुद्दीन सम्झिन्छन् – ‘तर मेरा लागि यो नौलो घटना थिएन,त्यसअघि पनि सयौँ हण्डर खाएको मैले त्यसअघि अर्को फिल्ममा पनि यस्तो भोगी सकेको थिए,जसले मेरो पारिश्रमिक समेत दिएको थिएन ।’