काठमाडौँ – बलिउड अभिनेता सञ्जय दत्तले बेलायतको भिसा नपाएकोमा आफ्नो धारणा राखेका छन् । 

बम्बे टाइम्ससँग कुरा गर्दै उनले यो निर्णयबाट आफू दुखी भएको बताएका हुन् । बेलायत सरकारले सही काम नगरेको जिकिर गरेका उनले पहिले भिसा दिएको बेलायतले किन अहिले दिएन भन्ने प्रश्न समेत गरेका छन् । 

साथै उनले यसअघि आफूले भिसा पाएको तर पछि रद्द भएको खुलासा समेत गरेका छन् ।

उनले बेलायतको भिसा नपाएकै कारण फिल्म ‘सन अफ सरदार २’ बाट हटाइएको खबर आएको थियो । फिल्मको अधिकांश छायाङ्कन हुने बेलायतको लागि भिसा नभएको कारण उनलाई चलचित्रबाट हटाइएको बताइएको थियो । 

तर, भारतीय सञ्चार माध्यम दैनिक भास्करले भने स्रोतको हवाला दिँदै सञ्जयलाई फिल्मबाट नहटाइएको, बरु उनी भारतमै बसेर आफ्नो भागको सुटिङ गरिरहेको समाचार प्रकाशन गरेको छ।