काठमाडौँ– नेपालको ठूलो चेन भएको ‘क्युएफएक्स’ले गत आर्थिक वर्षमा आफ्ना हलमा सबैभन्दा उत्कृष्ट व्यापार गर्ने नेपाली चलचित्रका निर्मातालाई सम्मान गरेको छ ।
आइतवार राजधानीमा एक कार्यक्रमको आयोजना गरी क्युएफएक्सले निर्माता र वितरकलाई विशेष अवार्ड सम्मान गरेको हो ।
क्युएफएक्स चेनमा गत आर्थिक वर्षमा महाजात्रा, बोक्सीको घर, दिमाग खराब, पुजार सार्की र भष्मे डनले सबैभन्दा बढी कमाइ गरेका हुन् ।
कार्यक्रममा चलचित्रका निर्माता निर्देशक र कलाकारलाई समेत अवार्ड वितरण गरिएको थियो । कार्यक्रममा निर्माता सुवास भुसालले ‘पुजार सार्की’ का लागि अवार्ड ग्रहण गरे भने ‘बोक्सीको घर’ का लागि निर्माता तथा अभिनेत्री केकी अधिकारीले अवार्ड थापिन् ।
यस्तै निर्देशक प्रदीप भट्टराई र निर्माता तथा कलाकार रविन्द्र सिंह बानियाँले ‘महाजात्रा’ का लागि अवार्ड थापे भने ‘दिमाग खराब’ का लागि निर्देशक निश्चल बस्नेतले अवार्ड ग्रहण गरे ।
यस्तै दीपेन्द्र के खनालले ‘भष्मे डन’ का लागि अवार्ड ग्रहण गरे ।
कार्यक्रममा क्युएफएक्सले एप्पल इन्टरटेनमेन्ट, एएट डिस्ट्रिब्युसन, ब्याङ्कटेस इन्टरटेनमेन्ट, एफडी कम्पनी र डीसीएनलाई पनि सम्मान गरेको थियो ।
क्युएफएक्स चेन अन्तर्गत अहिले १७ वटा मल्टिप्लेक्स हलमा ४० पर्दा छन् । नेपाली फिल्म मेकरले यी हलमा धेरै शो पाए भने फिल्मको आम्दानी सुरक्षित हुने विश्वास गर्छन् ।
यो खबर पढेर तपाईलाई कस्तो महसुस भयो ?
प्रतिक्रिया