-छविशीत कुलुङ

मन परेको मान्छे मनभरी छाइदियो
ढोका थुनेर सुत्दा नि सपनीमा आईदियो

जटिल थियो जटिल मेरो जिन्दगीमा
तिम्रो आगमनले सरल बनाइदियो

कालले लडाउँन नसकेको मान्छेलाई
अनिकाल आएर सहजै लडाइदियो

जसलाई मैले उभिन सिकाएको थिएँ
उसैले पो आज मलाई ढलाइदियो

उपहारमा गुलाबको फूल पठाइदिएँ
उसले जवाफमा काँडा पठाइदियो

***

वियर थपियो अनि रम थपियो
कम कम भन्दै अधिकतम थपियो

पिउनलाई बहाना खोज्दै थिए
बहानामा चिसो मौसम थपियो

पिउनेले चिसो बियर पिएर भन्यो
बल्ल शरीरमा तापक्रम थपियो

पिएपछि हाकिमको मनमा
पदभन्दा ठूलो अहम थपियो

शुरूमा मात्रै साथीले थपिदियो
पछि पछि त स्वयम् थपियो