काठमाडौँ– नेपालमा जाडो महिनामा फिल्मको व्यापार राम्रो हुँदैन भन्ने भाष्य स्थापना हुँदा ठूला मेकरले जाडो महिनामा सकभर आफ्नो फिल्म रिलिज गर्न नपरे हुन्थ्यो भनेझैँ गर्छन् ।
चाडबाड र गर्मीयामका समयका तुलनामा जाडोका बेला हलसम्म दर्शक जाँदैनन् भनेर कमै फिल्म रिलिज गरिन्छन् ।
यतिबेला भने दक्षिण भारतीय फिल्म ‘पुष्पा २’ को क्रेज यस्तो बढेको छ कि, बढ्दो जाडोमा पनि नेपालका मल्टिप्लेक्स हलमा फिल्म मध्यरातसम्म प्रदर्शन गरिएका छन् ।
अल्लु अर्जुन स्टारर बहुप्रतीक्षित फिल्म ‘पुष्पा २’ को क्रेज नेपालमा व्यापक देखिएको छ । काठमाडौँका हलमा यो फिल्म बिहान ४ बजेदेखि नै प्रदर्शन गरिएको थियो । बिहानी शो पनि पनि दर्शकको शतप्रतिशत अकुपेन्सी देखिएको छ भने दर्शकले टिकट पाएका छैनन् ।
यो फिल्मलाई काठमाडौँका मल्टिप्लेक्स हलले एक सयभन्दा बढी शो दिएका छन् भने तीमध्ये प्रायः सबै हलका टिकट विक्री भइसकेका छन् ।
यसको पहिलो भाग सुपरहिट हुँदा नेपालका हलमा पनि दर्शकको क्रेज देखिएको हो । रक्तचन्दन तस्करीको कथामा निर्माण गरिएको यो फिल्म निर्माण हुने घोषणा भएदेखि नै चर्चामा छ ।
अझ रोचक कुरा त के छ भने फिल्मले रिलिजअघि नै आफ्नो लगानी सुरक्षित गरिसकेको थियो । नेपालमा मात्र नभएर भारतमा पनि यो फिल्मको बाक्लो क्रेज बनेको छ ।
फिल्ममा अल्लु अर्जुनका अलावा रश्मिका मण्डना, फहाद फसिल, सुनिल, राव रमेश लगायतका कलाकारको अभिनय छ । निर्माण टिमले यसको तेस्रो सिक्वेल पनि निर्माण हुने घोषणा गरेको छ ।
‘पुष्पा २’ का कारण नेपाली फिल्म मारमा
नेपालमा ‘पुष्पा २’ को क्रेजका कारण नेपाल फिल्मको शो ह्वात्तै घटेको छ । नेपालमा ब्लकबस्टर व्यापार गरेर अनेक रेकर्ड बनाएको विजय बरालको फिल्म ‘पूर्ण बहादुरको सारङ्गी’ को शो मा पनि कटौती गरिएको छ ।
यस्तै मंसिर ७ गतेदेखि प्रदर्शनमा आएको फिल्म ‘तेल भिसा’ लाई पनि निकै कम शो दिइएको छ भने ‘ह्रस्व दीर्घ’ लाई त अझ कैयन् हलबाट उतारिएको छ । निर्माण टिमका अनुसार यी तीनै फिल्ममा हलमा राम्रो व्यापार गरिरहेका थिए ।
यो खबर पढेर तपाईलाई कस्तो महसुस भयो ?
प्रतिक्रिया