काठमाडौं- आईसीसी महिला टी–२० विश्वकप एसिया छनोटको सुपर ३ अन्तर्गत आजको खेलमा आयोजक थाइल्याण्डले नेपालसामू विशाल लक्ष्य प्रस्तुत गरेको छ।

टेर्डथाइ क्रिकेट मैदानमा टस हारेर पहिले ब्याटिङ गरेको थाइल्याण्डले २० ओभरमा मात्र २ विकेट गुमाउँदै १५८ रन बनाएको हो। थाइल्याण्डका लागि नानपत कोन्चारोन्काइले अविजित ५० रन बनाइन् भने ओपनर नताया बूचाथामले पनि ५० रनको महत्वपूर्ण योगदान दिइन्। अफिसरा सुवानचोनराथीले २९ रन र नाथाकम चान्थमले १४ रन जोडिन्।

नेपालका लागि मनिषा उपाध्याय र राजमती ऐरीले समान १–१ विकेट लिइन्। नेपाल र थाइल्याण्ड दुवै टोली यसअघि नै आईसीसी महिला टी–२० विश्वकपको ग्लोबल छनोटमा पुगिसकेका छन्।

आजको खेल जित्ने टोली एसिया छनोटको च्याम्पियन बन्नेछ। यद्यपि, नेपालले अहिलेसम्म थाइल्याण्डलाई पराजित गर्न सकेको छैन।