काठमाडौँ – अहान पाण्डे र अनित पड्डा अभिनीत रोमान्टिक फिल्म ‘सैयारा’ ले बलिउड बक्स अफिसमा तहल्का मच्चाइरहेको छ। प्रदर्शनको १५ औं दिनमा पनि फिल्मले आक्रामक कलेक्शन जारी राखेको छ।
फिल्मले हालसम्म ₹२८८ करोडको कमाई गरिसकेको छ। यसले शाहिद कपूरको ‘कबिर सिंह’ (₹२७८.८ करोड) को रेकर्ड तोड्दै बलिउडको सबैभन्दा धेरै कमाउने रोमान्टिक फिल्म बन्न सफल भएको छ।
प्रभास र दीपिका पादुकोणको ‘कल्की २८९८ एडी’ ले भारतभरबाट सबै भाषामा ₹७६७.२५ करोड कमाए पनि, हिन्दी संस्करणमा फिल्मको कलेक्शन ₹२९३.१३ करोड थियो।
‘सैयारा’ अहिले यो आँकडासम्म पुग्नबाट केवल ₹५ करोड टाढा छ। यो कमाई फिल्मले आगामी दुई दिनमै पार गर्ने सम्भावना देखिएको छ। विशेष कुरा के छ भने — ‘कल्की’ लाई यो कलेक्शन पार गर्न ११ हप्ता लाग्यो, तर ‘सैयारा’ ले तीन हप्तामै त्यो नजिक पुगेको छ।
१ अगस्टमा रिलिज भएका अजय देवगनको ‘सन अफ सरदार २’ र सिद्धान्त चतुर्वेदी–तृप्ति डिमरीको ‘धडक २’ बाट ‘सैयारा’ को कमाईमा कुनै उल्लेखनीय असर परेको छैन।
फिल्म समीक्षक तरण आदर्श का अनुसार, ‘सैयारा’ ले १४ औं दिनमा ₹६.५० करोड कमाएको थियो भने १५ औं दिन दिउँसो ३:१५ बजे सम्म ₹२.७५ करोड कलेक्ट गरिसकेको थियो।
मोहित सुरी निर्देशित यस फिल्मको बजेट मात्र ₹६० करोड रहेको छ। कम बजेटमा बनेको भए पनि, फिल्मले प्रेम कहानी, संगीत र मुख्य कलाकारहरूको अभिनयका कारण दर्शकहरूलाई प्रभावित गर्न सफल भएको छ। दर्शक तथा समीक्षकहरूद्वारा पाएको सकारात्मक प्रतिक्रियाले पनि यसको सफलता सुनिश्चित गरेको विश्लेषण गरिन्छ।
तीव्र गतिमा अघि बढिरहेको ‘सैयारा’ चाँडै नै ₹३०० करोड क्लब मा प्रवेश गर्ने देखिएको छ। अब सबैको ध्यान यो फिल्मले ‘कल्की २८९८ एडी’ को हिन्दी कलेक्शन पार गर्नेछ वा होइन भन्नेमा केन्द्रित छ।
यो खबर पढेर तपाईलाई कस्तो महसुस भयो ?
प्रतिक्रिया