काठमाडौं। स्वादिष्ट मात्र नभई अत्यधिक पोषणयुक्त फलको रूपमा चिनिने स्याउ स्वास्थ्यका लागि बहुउपयोगी मानिन्छ। विशेषज्ञहरूका अनुसार, स्याउमा पाइने भिटामिन र एन्टिअक्सिडेन्टले रोग प्रतिरोधात्मक क्षमता बढाउनुका साथै मुटु, मधुमेह र तौलसम्बन्धी समस्यामा समेत सकारात्मक प्रभाव पार्ने देखिएको छ।

विशेषज्ञका अनुसार, स्याउमा भिटामिन सी को मात्रा उच्च पाइन्छ, जसले शरीरको इम्युन सिस्टम मजबुत बनाउँछ। साथै, यसमा भिटामिन ए, ई, के र बी कम्प्लेक्स जस्ता महत्वपूर्ण भिटामिनहरू पनि पर्याप्त मात्रामा पाइन्छन्।

स्याउमा फाइबर र एन्टिअक्सिडेन्ट प्रशस्त हुन्छ, जुन मुटुको स्वास्थ्यका लागि अत्यन्त फाइदाजनक मानिन्छ। यसको नियमित सेवनले खराब कोलेस्ट्रोल घटाउने र राम्रो कोलेस्ट्रोल बढाउने काम गर्छ।

विशेषज्ञहरूका अनुसार, स्याउ कम क्यालोरीयुक्त भए पनि यसमा उच्च फाइबर पाइन्छ, जसले तौल घटाउने प्रयत्नमा रहेका व्यक्तिका लागि सहयोगी हुन्छ। लामो समय पेट भरिएको महसुस गराउने स्याउले अनावश्यक खाना सेवनमा पनि कमी ल्याउँछ। यसमा रहेका पोलिफेनोल र एन्टिअक्सिडेन्टले टाइप २ मधुमेहको जोखिम कम गर्न सहयोग गर्छ।

बजारमा उपलब्ध स्याउका विभिन्न प्रकारमध्ये हरियो स्याउमा बढी फाइबर र कम चिनी हुन्छ, जबकि रातो स्याउ एन्टिअक्सिडेन्टले भरिपूर्ण हुन्छ, जुन मुटुको स्वास्थ्यका लागि उपयोगी मानिन्छ।

यस्तै, पहेंलो स्याउमा पनि विविध पोषक तत्वहरू पाइने भएकाले पोषणविद्हरूले आहारमा सबै प्रकारका स्याउ समावेश गर्न सुझाव दिएका छन्।

विशेषज्ञहरू भन्छन्, दैनिक एउटा स्याउ सेवनले शरीरलाई आवश्यक भिटामिन र खनिजहरू प्रदान गर्नुका साथै थुप्रै रोगहरूको जोखिम घटाउन मद्दत गर्छ।